გასეირნება წავკისიდან ვაკის პარკამდე

მუქ-წითელა მრავალთვალა (Small Copper Lycaena phlaeas)

მრავალთვალას სინამდვილეში ორი დიდრონი თვალი აქვს. სახელი ალბათ ფრთებზე დახატული მრავალი თვალის გამო შეერქვა. ყველაზე მორცხვი, მაგრამ ცნობისმოყვარე პეპელა აღმოჩნდა. ჯერ ანტენები დახარა და თვალებზე აიფარა, მერე ფრთები აკეცა — დაგვიმალა, მერე ოდნავ მოშორებით, მცენარის ღეროზე გადაჯდა ისე, რომ მეორე ღერო აიფარა სახეზე. მერე გვერდულად გამოცოცდა “საფარიდან”, დიდ ხანს მათვალიერა, საშუალება მომცა ოდნავ ზევიდან გადამეღო, მერე  სხვა მცენარეზე გადაფრინდა და ჰოლოგრამასავით შეიცვალა ფერი ფრთებზე. უმარჯვებდა ფრთებს მზეს და თვალს არ მაშორებდა. თითქოს მაჩვენებდა რა შეეძლო. :)

  სემენოვის სამწიფარა (Calydus semenowi)  

ვერც ამ ჯიგრის ქართული სახელი მოვძებნე ჩემი ძალებით. საკმაოდ მძიმე იყო იმ ყვავილისთვის, რომლის ნექტარსაც დაეწაფა. ყვავილი ხოჭოს სიმძიმით გადაიხარა და თავდაყირა მოუწია დანაყრება. :) სახელის დადგენაში ისევ და ისევ არმენ სეროფიანი დამეხმარა “საქართველოს ველური ბუნება” ჯგუფიდან.

ციყვი

ცნობისმოყვარე ციყვი დიდ ხანს გვყნოსავდა და გვათვალიერებდა საფარიდან. როცა დარწმუნდა, რომ  ჩვენგან სასუსნავს ვერ მიიღებდა, რაღაც ჩაიბურტყუნა თავის ენაზე (მგონი: — “არა ხართ თქვენ მყიდველებიო”) და სოროსკენ მოკურცხლა.